پێشانگەی "درەوشانەوەی تاریکی" پێکهاتبوو لە نمایشکردنی ٢٤ تابلۆی مامۆستا سالار مەجید کە لەلایەن کەشکۆڵ، ناوەندی کلتوور و هونەری زانکۆی ئەمەریکی-سلێمانی ڕێکخرابوو بۆ یەکەمین دیداری کوردناسیی لە مانگی ئەیلوولی ساڵی ٢٠٢٥. پێشانگەکە پشتیوان بابەکر و سوفیان جەلال ڕێکیانخستبوو، کە ئەمەش لە ئەنجامی کارکردنی درێژمەودای پرۆژەی ئەرشیڤی هونەریی ناوەندەکە سەرچاوەی گرت کە پشتیوان بابەکر سەرپەرشتی دەکات.

هونەر وەک جۆرە یاخیبوونێکی ڕەمزی لە کارەکانی سالاردا 

لە ناو جەرگەی واقعێکی داگیرکراودا، کارە هونەرییەکان هەمیشە ڕوبەری هەرە گرنگی ئازادیین. خاڵەکان، هێڵەکان، پێکهاتەکان، ڕەنگەکان بەشێکن لە کەرەستە هەرە گرنگەکانی ئازادی. هێزی سەردەمێکیش لەسەر  ئازادبوون، گرێدراوی هێزی هونەرەکەیەتی بۆ دەربازبوون و ڕزگاری. "ئازادی" تەنیا لە هونەردا بە ترۆپکی هاواری خۆی دەگات، لێرەوە تێگەیشتن لە سەردەمێک بەبێ تێگەیشتن لە هونەری ئەو سەردەمە پرۆسەیەکی مەحاڵە. هەرگیز باوەڕم بەوە نەبووە، سەرەتا پێناسی سەردەمێک بکەین، دواتر لەسەر ڕۆشنایی تێگەیشتن لە هەلومەرجە سۆسیۆلۆژی و ئابووری و سیاسییەکاندا لە هونەر تێبگەین، هەمیشە پێچەوانەکەی دروستە، هونەر ئەو جێگایەیە کە دەشێت دەروازەی گەورەی تێگەیشتن لە سەردەمەکان بێت. وزەی نوێ و هێزی گۆڕانکار، کاتێک لە هەناوی سەردەمێکەوە دێنە گۆ، یەکەمین زمان قسەی پێدەکەن، زمانی هونەرە. زیادەڕەویی نییە بڵێم، بۆئەوەی لە ڕۆحی قۆناغێک تێبگەین، ڕوانین لە تابلۆکان، دەروازەی یەکەمی ڕۆچوونە بۆ لای ئەو کێشمەکێشە قووڵانەی لە ژێرەوەڕا کۆمەڵگایەک دەبزوێنن. 

من لەو ڕوانگەیەوە لە هونەری سالار دەڕوانم، وەک ڕووبەرێکی دەلالی گەورە، بۆ ڕوانین و تێڕامان لە ماهییەتی ئەم سەردەمەی تێیدا دەژین.

هونەر دەروازەی یەکەمی تێگەیشتنە لەو هەوڵانەی ڕۆحێکی دیلکراو بەرەو ئازادیی دەجوڵێنێت. ڕەهەندە قووڵەکانی ئازادیی لە سیاسەتدا دەرناکەون، بەڵکو لە هونەردا گوزارشت لە خۆیان دەکەن. کاتێک تێگەیشتین هونەرمەندان چۆن پراکتیکی ئازادیی دەکەن، دەتوانین تێبگەین دەیانەوێت لە چی ئازاد بن و بەرەو کوێ بجوڵێن.  

ئەوەی لە هونەردا بۆ من شوێنی سەرنجە تەکنیک و مەتریال و کۆمپۆزسیۆن نییە، ئەوە ئاستێکە چاکترە هونەرمەندان خۆیان پێوەی سەرقاڵ بن، بەڵکو ئەو شفرە نهێنییانەیە کە ئەو کەرەستانە بۆ ئێمەی دەگوازنەوە. ڕۆحی فۆرم دەبێتە ڕووبەرێکی مردوو، ئەگەر توانای گوزارشتی لە هێزێکی نوێی ڕوانین و جیهانبینییەک نەبێت. بەڵام جیهانبینی لە هونەردا زمانێکی جیاوازی هەیە و بە زمانی ئاسایی گوزارشتی لێ ناکرێت. ئەم جیهانبینییە وەک لە دونیای ئەدەب و فەلسەفەدا ڕاستەوخۆ و ئاسان نادوێت، ڕوونیش لە گوزارشتی تیوریدا جێگای نابێتەوە. "زمانی ئازادی" لە هونەردا هەمیشە زمانێکی ڕەمزییە، ئاڵۆزە، تەماوییە، هێماسازە. قووڵایی هونەر لەو جێگایەوە دەست پێدەکات، کاتێک زمانی گوزارشت لە ڕستەی ڕوونەوە بەرەو نزیکبوونەوە لە زمانی خەون دەجوڵێت، کاتێک هەموو شتێک مانا ڕاستەوخۆکەی لە دەستدەدات تا پردێک لەگەڵ مەحاڵ، سوریال، خەیاڵدا بونیادبنێت.  

تابلۆ شوێنی سەرهەڵدانی ئەو زمانە ڕەمزییەیە کە "سەردەمێک" لە ڕێگایەوە دەدوێت. تابلۆ وەک شیعر وایە، ڕووبەرێکە "ئازادی" لە نێویدا ڕادیکالترین یارییەکانی خۆی دەکات، بەڵام مەرج نییە هەموو ئەزموونێکی هونەری بتوانێت گوزارشت لە پەیامە ڕەمزییەکانی سەردەمی خۆی بکات و بتوانێت دیوە ڕادیکالەکەی هونەر نیشانبداتەوە.

لە ئەزموونی سالاردا ئەو گەمە ڕادیکالەی "ئازادی" بە ڕوونی دەبینین، سالار بابەتێکی نییە تیشکی بهاوێتەسەر، بەسەرهاتێکی واقعی نییە بیەوێت نیگاری بکێشێت، هەڵچوونێکی دەروونی نییە، بیەوێت بیخاتە سەر زمانی ڕەنگ و بە تابلۆ گوزارشتی لێ بکات، ئەبستراکتیستێک نییە بۆ شێوەسازییەکی نوێ بگەڕێت کە هونەرمەندانی پێش خۆی نەیانکێشاوە، سالار بە پێچەوانەوە فۆرمێکی هەیە کە هەرگیز شێوەیەکی کۆتایی لە خۆی ناگرێت، ئەو حیکایەتخوانی فەزایەکە لە چێوە و داڕشتەیەکدا ناسرەوێت.
 

لەو کۆمەڵگایانەدا کە هەمیشە بە دوای مانای نەگۆڕ و وێنەی چەسپیو و فۆرمی داخراودا دەگەڕێن، هەر کردارێکی هونەریی فۆرمی نەگۆڕ و لەقاڵبدراو و چەسپیو بەرهەمبهێنێتەوە، بە جۆرێکی ڕەمزی هەمان خواستی سیستەم بۆ داڕشتنی پێناسەی نەگۆڕ دووبارەدەکاتەوە، بەڵام هونەر لای سالار پۆڵی پێچەوانەی ئەو خواستەیە، دەستکاریکردن و شکاندنێکی بەردەوامی ئەو وێنانەیە کە بۆ قاڵب دەگەڕێن.  

بە بڕوای من چاکترە هیچ کارێکی سالار بە تەنیا وەرنەگیرێت، هیچ کارێکی یەکەیەکی داخراو نییە بشێت مانا قووڵەکەی لە خودی خۆیەوە بە تەنیا وەربگرین. تابلۆکان تێکڕا پێکەوە سروشتی ئەو یارییە ڕادیکالەی ئازادی ئاشکرادەکەن، یاریی ڕاکردن لە قەتیسمان لە فۆرم و مانای نەگۆڕدا. ناتوانین لە کارەکانی سالاردا بۆ مانای ڕوون بگەڕێین، کارەکانی سالار چیرۆکێکی ڕوونیان نییە بیگێڕنەوە، بەڵام نەبوونی چیرۆکێک بە مانای نەبوونی مانا نییە. سالار بە کۆی ئەزموونەکەی ئەو ڕاستییە دەسەلمێنێت کە "ئازادی" لە یەک فۆرمدا جێگای نابێتەوە، بە ڕوانین لە تەواوی کارەکانی، دەگەینە ئەو دەرەنجامەی لێرەدا یەکێک هەیە شتێک دووبارەدەکاتەوە، تا بیسەلمێنێت دووبارەبوونەوە مەحاڵە، فۆرمێک دووبارەدەکاتەوە، بۆئەوەی بیسەلمێنێت لە قووڵایی هەموو فۆرمێکدا هێزێک هەیە هەڵیدەوەشێنێتەوە. 

سالار بە پێچەوانەی زۆر لە هونەرمەندانی ترەوە، هەندێک جار یەک فەزا بە جۆرێکی ناسروشتی دووبارەدەکاتەوە، بە شێوەیەک وەک بیسەلمێنێت هیچ یەک لەو فۆرمانە ناتوانن دوا فۆرم بن، وەک ئەوەی هەموو تابلۆیەک ئاماژەبێت بۆ نوقسانیی تابلۆیەکی پێشووتر، وەک هەموو تابلۆیەک مانفێستێک بێت، دەربارەی نەگەیشتن بە کەماڵ. هەر تابلۆیەکی سالار کە لێی دەڕوانین، دەبێت ئەوەمان لە بیر بێت، ئەم تابلۆیە خاڵێکە لە ناو جەریانێکدا کە دەردەکەوێت و دەڕوات، ئەوەی تابلۆکەش دەیەوێت بەرجەستەی بکات پتر جوڵەی لێشاوەکەیە، نەوەک ساتەوەختی ناوازە و سەربەخۆی خۆی.

لە هونەردا هیچ فۆرمێک نییە بە شافۆرم ناویبنێین، تابلۆ شوێنێکە لە نێویدا "ئازادی" خۆی وەک دوودڵی، ڕاڕایی، نائارامی بەرجەستەدەکات. ئازادی لە مانا گەورەکەیدا، واتە هیچ بەربەستێک نەبێت بە ڕێگر لە بەردەم هەنگاوی دواتردا، ئازادییش لە هونەردا، واتە هیچ فۆرمێک نەبێت بە بەربەست لە بەردەم  فۆرمی داهاتوودا. هونەر لەسەر نەگەیشتن بە کۆتایی و کەماڵ دادەمەزرێت، بەڵام کەم هونەرمەند دەتوانن ئەم جەوهەرەی هونەر لە کارەکانیاندا بەرجەستەبکەنەوە. کەم هونەرمەندم بینیوە وەک سالار، بەو ڕوونییە گوزارشت لەوە بکەن، کە تابلۆ تەنیا خاڵێکە لەسەر هێڵێک بەرەو ناکۆتا درێژدەبێتەوە. 

لە کولتوورێکی داخراوی وەک کولتووری ئێمەدا، کەس ناتوانێت بەبێ پاڵپشتی ئایدۆلۆژیا و ئیمانی نەگۆڕ باس لە ئازادیی بکات، ئەم جۆرە پراکتیکەی سالار بۆ ئازادی، ڕەتکردنەوەیەکی ڕەمزیی ئەو کولتوورەیە، کاتێک تابلۆ دەگۆڕێتە سەر جێگایەک بۆ نەسرەوتن، جێگایەک "مانا" لە نێویدا سروشتە جێگیرەکەی خۆی لە دەستدەدات. ئیشی تابلۆ ئەوە نییە مانا بەرهەمبهێنێت، بەڵکو ئەوەیە ماناکان بلەقێنێت و نابەجێ دەریانبخات. "ئازادی" لە هونەردا لە دروشمی کۆنکرێت و ڕووندا گوزارشت لە خۆی ناکات، بەڵکو خۆی لە دوودڵییەکدا دەبینێتەوە کە ناسرەوێت و  ناگاتە یەقین. بە بڕوای من ئەزموونی سالار بە گشتی، بە هەموو قۆناغ و فۆرمە جیاوازەکانییەوە، بە کۆی کارەکانی، بە خواستە ڕۆژانەکەی بۆ نوقمبوون لە ڕەنگدا، گوزارشت لەو نەگەیشتنە بە "یەقین" و "دڵنیایی" دەکەن. 

فۆرم لای سالار گوزارشتە لەو ڕاستییەی، جیهان تەنیا لەو ساتەدا جوانە، پێش ئەوەی قاڵبێک بێت و بیگرێت و دیلی بکات. سالار وێنەگری جیهانێکە کە هێشتا نەبۆتە خاوەنی وێنەیەکی ڕوون، لێرەوە فۆرم ئاماژە بۆ شێوەیەکی نەگۆڕ ناکات، بەڵکو هێمای ترازان و هەڵوەشانەوەیەکی هەمیشەییە، سالار نیگارناکێشێت تا بابەتێک «ئۆبژێکتێک»ـی کۆنکرێت بخاتە بەردەممان، بەڵکو نیگاردەکێشێت تا ڕەوینەوە و بەهەڵمبوون و دیارنەمانی تەواوەتی هەموو بابەتەکان بەرجەستەبکات. کاتێک پێدەخەینە سەر سەرزەمینی ئەم هونەرمەندە، هیچ جێپێیەکی جێگیر و نەلەرزیو و سەقامگیر بوونی نییە، پێی لەسەر دابنێین، هیچ ئۆبجێکتێکی کۆنکرێت نییە بە دەست بیگرین و بە چاو مەوداکانی بپێوین... ڕەنگ، خاڵ، فەزا، تێکڕا جوڵەیەک بەرجەستەدەکەن ناهێڵێت جیهان شێوەیەک لە خۆی بگرێت و بوەستێت. 

ئەگەر کارەکانی سالار بە تەنیا وەربگرین و وەک یەک یەکەی داخراو لێیان بڕوانین، یاخود قۆناغەکانی وێنەکێشانی جودا لە یەک تەماشابکەین، ئاسان ئەو دڵەڕاوکێ قووڵە نابینین کە بە کۆی ئەزموونەکەی دێتە دەستمان. ڕاستە هەموو کارێکی هونەریی بۆ خۆی یەکەیەکی دەلالییە، دەشێت وەک جیهانێکی سەربەخۆش مامەڵەی لەگەڵدا بکرێت، بەڵام لای ئەو هونەرمەندانەی کارەکانیان شفرە و دەلالەتی جیهانبینییەکی قووڵ دەگوێزنەوە، گەیشتن بەو دەلالەتانە لە ڕێگای یەک کارەوە مەیسەر نابێت، بەڵکو ئەزموونی گەورە هەمیشە لە ڕێگای ڕوانین لە کۆی هەنگاوەکانییەوە دەبینرێت و دەخوێندرێتەوە. ئەو مانایەی یەک تابلۆی سەربەخۆی هونەرمەندێک دەمانداتێ، وەک ئەو مانایە نییە كه‌ دەیان تابلۆی هەمان هونەرمەند پێکەوە پێمان دەبەخشن. ئەوەی هەموو کارێکی هونەریی کارێکی سەربەخۆیە، ئەو ڕاستییە ڕەدناکاتەوە کە هەموو کارێکی هونەریی لە بەستێنێکی تایبەت و لە ناوکۆییەکی تایبەتدا مانای دیکە وەردەگرێت و ئاسۆی دیکە ئاشکرادەکات. تابلۆ بە تەنیا دەشێت مانایەک ببەخشێت، بەڵام لە دۆخی پەیوەندیدا لەگەڵ کارە هاوشێوەکانیدا، زنجیرەیەکی نوێ دروستدەکات و مانای نوێ دەخولقێنێت. بە کورتی تەنیا بە ڕوانین لە کۆی کارەکانی هونەرمەندێک، دەتوانین شفرە قووڵ و هێما شاردراوەکانی ئەزموونێک بخوێنینەوە.

کاتێک لە کۆی ئەزموونی چەند ساڵەی سالاریش دەڕوانم، لەگەڵ تابلۆکاندا ئەو هەستەم هەیە، وەک یەک سات بەسەر دەیان شێوەدا بکرێتەوە، یەک فۆرم سنوورە ناکۆتاکانی خۆی تاقیبکاتەوە، یەک دەلالەت بە جۆرێک خۆی وردبکات، دەیان دەلالەتی دیکەی لێوە هەڵبقوڵێت. لێرەدا فۆرم بەردەوام سنوورە زانراوەکانی خۆی دەشکێنێت، تا لە پرۆسەیەکی ناکۆتادا ڕەگەزە جیاوازەکانی خۆی لە ڕیزبەندیی نوێدا ڕێکبخاتەوە. کاتێک فۆرم لە تابلۆدا شێوەی پێشووی دەشکێنێت و وێستگەی پێشووی جێدەهێڵێت، دەبێتە هاوتەریبێکی ڕەمزیی بۆ شکاندنی هەموو پێناسەیەکی نەگۆڕ و هەموو نیگارێکی نەگۆڕ بۆ دونیا، وەک هونەری سالار زمانحاڵی یاخیبوونێک بێت دژ بە بەستنەوەی نیگامان بە تەنیا نیگارێکەوە، وەک شۆڕشێک بێت دژ بە هەر وێنەیەک بیەوێت لە چرکەساتێکی وەستاو و لە قاڵبدراودا بمێنێتەوە. تابلۆ خۆی بە تەنیا ساتێکی نەگۆڕە، تەنیا لە ساتی بەراورد و گرێدانەوەدا بە تابلۆکانی دییەوە،  تێدەگەین چ دەلالەتێکی شاردراوە و چ شفرەیەکی پەنهانی هەڵگرتووە. چۆن لە زماندا هەموو وشەیەک تەنیا لە ڕستەدا دەلالەتی ڕاستەقینە وەردەگرێت، کارەکانی سالاریش وەک وشەگەلێک وەهان تەنیا لە ڕستە گەورەکەدا مانایان ئاشکرادەبێت، واتە لە کاتی گرێدانەوەی ئیشەکاندا بە یەکتر... لە کاتی دۆزینەوەی ئەو هێڵە نهێنییەی تابلۆکان پێکەوە دەبەستێتەوە.

دنیای تابلۆکانی سالار لە ناوەوە، وەک شوێنی هەڵچوونی ڕەنگ وەهان، هەمیشە تەمێکی بزۆک و ڕەنگین و خۆنەگر لە نێویاندا دەجوڵێت، وەک بیەوێت دۆخی گەردوونێک لە دوودڵی خولقان و نەخولقاندا بگوازێتەوە. جوانی لە ئیشەکانی سالاردا دێت تا زوو بڕەوێتەوە، خێرا خاڵەکان، هێڵەکان، ڕەنگەکان لە تابلۆی داهاتوودا جێگای خۆیان دەگۆڕن و کورتە ساتێکی دیکەی جوانی پیشاندەدەن. وەک ئەوەی جوانی شتێک بێت تەنیا لە گۆڕاندا ببینرێت، تەنیا لەو مەودای گواستنەوەیەدا بێتەبەرچاو کە لە تابلۆیەکەوە بۆ تابلۆیەکی تر دەگوازینەوە. زۆر ئیشی سالار هەیە دەبێت پێکەوە ببینرێن، وەک تابلۆکان پێکڕا پرۆسەی «بەرەوبوون ـ صیرورة»ێکی بەردەوام نیشانبدەنەوە. بە بڕوای من دونیای سالار نە ئەبستراکتە و نە جۆرێکیشە لە تەعبیرییەتی ڕەمزی، بەڵکو ئیشەکانی ئەو زمانحاڵی جیهانێکن نایەوێت لە سرەوت و وەستاندا دەربکەوێت، ئەو جوڵە نەسرەوت و نەگیراوەش تەنیا کاتێک دەبینرێت کە کۆی کارەکانی وەک تەواوکەری یەک ببینین. تەماشاکردنی یەک لە دوای یەکی ئیشەکانی سالار، وەک ڕاوەستانە بەرامبەر سەدیمێکی گەردوونی ڕەنگاوڕەنگ کە لە هەموو ساتێکدا فۆرمێک وەردەگرێت، کورت دەردەکەوێت بۆئەوەی ونبێت، هەموو تابلۆیەک ساتێکی دەرکەوتنی ئەو سەدیمەیە کە خێرا بە دوایدا ساتێکی تر و فۆرمێکی تر لەدایکدەبێت. وەک سالار دەیانجار بمانباتەوە ناو هەمان خەون، بۆئەوەی هەموو جارێک کاتێک وریادەبینەوە تێبگەین لە خەونێکی نوێدا بووین. کاتێک تابلۆیەکی سالار دەبینین، دەبێت وەک خاڵی پەڕینەوە بۆ کارێکی تر لێی بڕوانین، وەک خەونێک کە تەنیا بۆئەوە لێرەیە، لە ڕێگایەوە بپەڕێینەوە بۆ ناو خەونێکی تر. ئەو کارانە تەنیا لە پیوەندییاندا بە یەکەوە زیندووێتییان دەردەکەوێت، وەک بەشێک لە جوڵەیەکی فراوانتر بەرەو هەمەڕەنگی، دژ بە هەر جیهانێک خۆی لە قاوغە تەسک و بیرۆکە تاک ڕەهەندەکاندا دیلبکات.

هونەر ئەو کارخانە گەورەیەیە، لە نێویدا دیوە نەگۆڕ و چەسپیوەکەی کۆمەڵگا دەشکێنرێت. لە ئەزموونی سالاردا شفرەیەک هەیە پێماندەڵێت، «لێکچوون» وەهمە، ئەوەی گەردوونی و بنەڕەتییە «جیاوازی» یە. بایەخی ئەو پەیامە نهێنییە کاتێک دەردەکەوێت، کە دەزانین سالار لە جیهانێکدا دەژی لە قاڵبە جێگیر و وێنە نەگۆڕەکانی خۆیدا دیل بووە، لە کۆمەڵگایەکدا بە جۆرێکی تراژیدی ڕابوردوو خۆی دووبارەدەکاتەوە، جیهانێک «بەرەوبوون ــ صیرورة» تێیدا لە ڕەوتی خۆی وەستاوە و لە بازنەی داخراودا گیریکردوە. جیهانێک هەموو سیستمی خۆی خستۆتەکار تا لێکچوون دروستبکات و دووبارەبوونەوە بخولقێنێت، تەنیا هێزی ڕاستەقینەش کە ئەو لێکچوون و دووبارەبوونەوە ساختەیە ئاشکرادەکات، هونەرە. هونەری سالار جۆرە یاخیبوونێکی ڕەمزییە، دژ بە سەردەمێک لە زنجیرەکانی خۆیدا گیری خواردوە. 

بەختیار عەلی

پێش کۆتایی هاتنی کاتی پێشانگەکە، کەشکۆڵ ویستی ئەزموونێکی نوێ لە ناو شوێنی نمایشەکەدا بکات. ئێمە نمایشێکمان شێوەڕێژ کرد تا لە ڕێگەی دەنگ و بێدەنگی و جووڵەی بەکۆمەڵ، ڕێ بۆ ڕوانینێکی ئارام و ورد خۆش ببێت. لەم نمایشەدا، فەهد حەربۆ ڕاستەوخۆ لە ناو هۆڵی پێشانگە سازی دەژەنی لە کاتێکدا هەریەک لە بەشداربووان بۆ ماوەی خولەکێک لە بەرانبەر تابلۆیەکی درەوشانەوەی تاریکی ڕادەمان و بە بێدەنگی بە نێو هەموو بیست و چوار کارەکەی ناو گەلەرییەکەدا سووڕانەوە. دەنگی ئیمان ئەحمەد لە پاڵ فەهد و دەنگی سازەکەی، بوونێکی تازەی بەبەر ژینگەی پێشانگەکەدا کرد. 

فەهد حەربۆ ڕاستەوخۆ لە ناو هۆڵی پێشانگە سازی دەژەنی لە کاتێکدا هەریەک لە بەشداربووان بۆ ماوەی خولەکێک لە بەرانبەر تابلۆیەکی درەوشانەوەی تاریکی ڕادەمان.

بە درێژایی یەکەمین دیداری کوردناسی، کەشکۆڵ کۆمەڵێک پێشانگەی لە زانکۆی ئەمریکی لە سلێمانی ڕێکخست و بەمەش پەرژینی زانکۆی کردە ڕێڕەوێکی بزۆز لە بەیەکگەیشتنی هونەر و توێژینەوەی ئەکادیمی. دیدارەکە وەک پلاتفۆرمێکی توێژینەوە و گفتووگۆی نێودەوڵەتی، بۆ بەستنەوەی دەنگە کلتوورییە نەریتییەکانی کورد بە لێکۆڵینەوە ئەکادیمییە هاوچەرخەکان، خزمەت دەکات.

بەیەکبەستنەوەی گەلەری تایبەت بە هونەرمەندانی هونەری بینراو، خوێندنەوەی دەقەکان لەلایەن نووسەران و وەرگێڕەکان، و پێشکەشکردنی نمایشی موزیکی، بە مەبەستی ئەوە دەکرێت کە پاراستنی فەرهەنگی کوردی، تەواوکەری خوێندنەوەی ڕەخنەگرانە و لێکۆڵینەوە بێت. لە ناو ئەم ژینگە فرەچینەی بەرهەمهێنانی کلتووری هاوچەرخدا، کەشکۆڵ بەشێک لە کارەکانی سالار مەجیدی پێشکەش کرد.